Senin, 03 April 2017

pidato pasambahan makan sampai maurak selo



Pidato Pasambahan Untuak Ka makan


Sutan Bagindo

Adat Taluak timbunan kapa,pusek jalo kumpulan ikan,adat gunuang tapatan kabuik, disutan tapatan sambah  sambah tajelo kanan rapek ,salam tatabua katangah-tangah ,talirik tabantang salam dimungko ibu jo bapak , dihadapan niniak jo mamak , langkok juaro jo pitunggua,sarato pangarang jo buatan bakeh ambo manyambahkan sambah , manimbang ateh nan adoh manyiang di ateh tumbuah, tumbuah sarupo iko kini, talatak pinggan dilapiak di diisi jo edangan ,basusun galeh jo cawan barisi ayia kasadonyo, basusun di ruang tangah, balirik di ruangan tapi , mambayang-bayang kamungko, mancayo  kautak jo banak, tapi samantang pun baitu dirumah jorok manjorok dek rumah liku –baliku, antah dindiang dinan kalam antah talamun dek nan banyak, mintak ditiliak di pandangi dek karano janang kami mudo matah, kok kurang nak kami tukuak kok senteang nak kami bilai , Takilek cupak jo gantang ,tabayang bareh  jo balabeh, nak nyo salamuak samparono nak sampai niek sipangkalan, barupo ayia dicawan mintak diminum nasi dipiriang mintak di makan, ,dabuak ayia pulau kilangan, pandan sapanjang muaronyo, tibo ayia basuah lah tangan makan kito sadonyo, sakian sambah tibo kaaribaan sutan.

tadiri adat jo pusako ,pusako banyak pusako, pusako diateh tumbuah, tumbuah sarupo iko kini, nasi dipiriang nak mintak dimakan ayia dicawan nak mintak di minum,

Sutan Maharajo
Tapi walaupun nanbak itu adopun masak jamba nan katangah adolah duo tigo palakaro ,
            Partamo masak didapua,
            Kaduo masak di makan
            Katigo masak jo mufakat.

Adopun masak di dapua tajarang di tungku batu tigo,baselang kayu di bawah nyo disinan apii mangkok iduik, baro nan kajok-kajok jarang,talambek kadang lambiak matah, talampua kacau nyo lah ragu , kajadi nasi nyo lah sagan pulang ka bareh nyo tak namuah,

Adopun masak dimakan, disanduak nasi putiah kapua di sanduak kapinggan batirawang, nasii putiah tanak nyo kambang, kambang nan bagai bijo limau,di tangah awan magajuju ,nago bajuak kiri kanan, mairiang gulai duo tigo , rono kuniang baun nyo harum nak bak bungo kambang saparak, dimakan baguman-guman, kuah sagiro jadi darah nasi bagageh jadi dagiang,

Adopun masak jo mufakat  tabaun se awih lah lapeh,tapandang paruik lah kanyang, sungguah pun nasi balun kami sintuah,barati lah kami makan basamo-samo.

Sekian sambah di pulangkan bakeh sutan Bagindo

 Sutan Bagindo

              alaukan jawih nan panyinduak
              kasawah urang tanjuang sani
              nak dapek rumpuik daun banto
              manangih sanduak jo pariwuak
              maupek  piriang baisi nasi
              takan jariah tak badaso
Aratinyo Bana, kok nan jauh lah kami hampirkan,kok nan matah lah       kami masakkan, dinasi sutan babaso bailau ratok rang didapua, badoso   sutan tantang itu..                                

Sutan Maharajo

             Mandanga titah sutan tako, dek takuik kami kabadoso ,gabak dihulu  tando kahujan, cewang dilangik tando kapaneh, kok ari jadi hujan lai  kok samo kadi raok nyo kito kasadonyo  lai kok kasaedaran alek jo sipangkalan .

Sutan Bagindo

            kini baitulah sutan, suruik sutan salangkah baralah ambo sabanang, ibarat lago lai kasamo tagak di nan manang, antah kok kalah kaduo nyo, dek karajo ado duo tigo nan kadi awai, kok idak salangkok ganok nyo kami tampak ,balangkok kan sajo jo mufakat,

Sutan Maharajo

            Tantang edangan nan katangah dek banyak macam ragam nyo, ragu lah mato dek mamandang nak jan kami sasek awai tunjuak an ikua kapalonyo .




sutan Bagindo

            kok pintak kabuliah kandak kabalaku
dibalah rotan dibalah, dibalah di bagi limo
dimulai jo bismilah , di sudahi dengan Alhamdulillah,
itulah ikua kapalo nyo

Sutan Maharajo

            Nak urang si koto pangkalan
            Nak lalu kasungai pangalek
            Mulai lah dek sipangkalan
            Buliah nak manurik kami sialek.

Sutan Bagindo

            runduakkan kayu batang kayu kalek
            kabawah kayu panajunan
            nak tarang jalan kadanau
            nasi basanduak untuak alek
            pangkalan biaso kakudian
            patambuah nan inyo silau,

Sutan Maharajo

            Kok iyo kami kapakan
            Kamano jalan kataluak
            Kok iyo kami kamakan
            siapo namo tukang sanduak


Sutan Bagindo

            marapalam sarangkai anam
            di amabiak anak sanjo rayo
            sagalo anak jo pasumandan
            itu nan tukang sanduak tako

Sutan Maharajo

            Ko iyo kami kapakan
            Mano toh baju lakan kami
            Kok iyo kami kamakan
            Apo sipuak makan kami


Sutan Bagindo

            tak pawuah jo sungai nanam
            katigo jo lekok pulai
            tibo ayia basuah lah tangan
            campuakan nasi dengan gulai.
            Itulah kasipoak makan sutan.

Pasambahan Sasudah Makan


Sutan Maharajo
            Sabarih sambah ditibokan kabakeh sutan bagindo

sutan bagindo
            Manitah lah sutan maharajo

Sutan Maharajo
            Kailia ka  Sungai Nanam
            Kamudiak ka koto tuo
            Ari nan sadang tangah hari
            Duduak tamanuang sudah makan
            Lah anguih tangan kanai lado
            Apo kok sipuak badan kami

sutan bagindo
            Kailia kakoto tuo
            Kamudiak kakoto pangkalan
            Koklah anguih tangan kanai lado
            Ambiak lah ayia basuah lah tangan

Sutan Maharajo
            Silunak pai kapakan
            Tibo dipakan mambali gulo
            Kok nan lunak lah kami makan
            Kok nan kareh kabapo pulo

sutan bagindo
            Silunak pai kapakan
            Tibo dipakan mambali banang
            Kok nan lunak lah sutan makan
            Kok nan kareh kito suruah japuik dek sirajo janang  





Pidato Maurak Selo


Sutan Maharajo
            Lah ditiliak awa rundiang ,lah ditimbang akia kato,sungguah bana lah nyato, rundiang usang pahamlah tantu ,balatiah janji,baruruik bacupak bagantang panuah, bagantang indak buliah luak,cupak nan indak buliah panuah,tasanda di tiang panjang,taantak di sandi padek,tasimpan dibiliak dalam,  di pagang niniak jo mamak,hak nan namo hak dalam adat itu nan samo di kunjungi,pintak jo pinto di lakukan,den nan dimukasuik alah sampai ,nan di ama alah pacah,limeh di pinang pun alah layua,jikok dikambang pun alah basah,jamba dek arok punlah carai, aratinyo bana dek lamo duduak lah raso panek dek lamo tagak lah maraso paniang, sagalo datuak jo tuangku nak maurak selo, tuan malin nak maurak simpuah, sirapek banyak nak pulang  katampek masing-masing ambo sandiri nak mairiang di balakang.
                 Sakian sambah bakeh Sutan

sutan bagindo
            tapi samantang pun baitu  hanyo sabuah nan marusuah hanyo ciek nan          mambedo,
            Batimbunan lado dalam taluak
            Tiok nan tibo bakaranjang
            Minum kok kurang sajuak
            Makan kok kurang kanyang maaf jo rido kami mintak .

            Marapalam sarangkai masak
            Diambiak anak sanjo rayo
            Hari kalam bulan tak Nampak
            Kami malapeh sio-sio

Sutan Maharajo
            Marapalam sarangkai masak
            Diambiak anak tinggi hari
            Hari kalam bulan tak tampak
            Salangi kami bakeh sigi

            Lah cukuik sandi batu rumah
            Mananti tukang kamamulai
            Lingkuik lapiak sapulah rumah
            Assalmua”laikum panyudahi

sutan bagindo
            Nak urang bukik batabuah
            Kapakan mambali garam
            Nak batamu nak urang ampek angkek
            Kamudiak jalan kok runtuah
            Kailia jalan kok taban
            Urang maliang banyak nan jaek


Sutan Maharajo
            Nak urang dari pakan baso
            Nak pai ka koto tuo
            Hari nan sadang pukua ampek
            Balayia banah kodo
            Bajalan banan tuo
            Indak sio-sio kami barangkek

sutan bagindo
            kain suto dari pangkalan
            bajumbai lagi bajambua
            garaian anak jo mintuo
            itulah rajo dilautan
            sutan mamintak kabajalan
            hari kalam bulan kok kabua
            hari hujan labuah kok basah
            siso-sio kami malapeh
            bamalam  molah dahulu 

Sutan Maharajo
            Satu rajo tanah batak
            Kaduo rajo tanah banten
            Itulah rajo sadaulat
            Mamakai mangkuto kadaulatan
            Tatabua ameh sirajo jati

            Salam jo maaf ambo mintak
            Jikok seloang mintak sutan
            Lah ambo bao kamufakat
            Bukan ambo nan babaso
            Niniak jomamak nan managah
            Usah sutan bakaciak hati

sutan bagindo
            marapalam sarangkai anam
            diambiak sado nan masak
            di bao kapaninggahan
            janjang taban
            pintu bapasak
            kamano sutan kabajalan

Sutan Maharajo
            marapalam sarangkai anam
            diambiak sado nan masak
            hari nan sadang pukua duo
            janjang taban pintu bapasak sutan batukang basugiro

3 komentar:

  1. Sapuluah bilangan jari,
    nan ampu paling di suko,
    sabana mantap hantaran chan jeffri,
    ikolah urang nan tau di adaik jo pusako

    BalasHapus
  2. Baju piama taluak balango
    Datuak mamakai sapanjang hari
    kalau buliah kami batanyo
    Dari ma asa, dima kok nagari

    BalasHapus
  3. JazakAllah katsiran....Datuak....

    Z. DT. TAN BARO

    BalasHapus